04.01.2012

Truepa partides y turnoies danter Nadel y l ann nuef per i jëuni

La scuadra Under 10 à n juebia ai 28 de dezëmber jugà si prima partida de campiunat provinziel n cësa contra la scuadra dl’Alta Badia. I mutons se à fat drët saurì y à venciù cun merit per 11:0.

I mutons dla Under 12 furnei ai 30 de dezëmber sun Renon, se aspitan coche for contra l Renon, na partida nia saurida. La scuadra dl Gherdëina à purempò jugà drët bën, ma la ti à sciacà mpue y la fertuna ne fova nia iust da si pert. Ëi à perdù chësta partida per 2:5. Bele trëi dis do à chisc mutons fat mo n’autra partida, chëst iede n cësa contra la scuadra dl Toblach/Persenon. Tlo ti àla drët butà, i mutons se à purvà dassënn y à venciù plutosc saurì per 5:1 cun i tëmps jic ora 3:0, 0:1, 2:0.

La scuadra dla Under 14 à jugà n mierculdi ai 21 de dezëmber n cësa contra l Kaltern. I mutons à jugà drët bën, l Gherdëina drucova tresora dan la cassa di averseres, ma mpo se ài fat ert a abiné ite chisc goi. Ala fin iesi stac boni de vëncer per 2:1 contra una dla scuadres plu stersces dl campiunat. Chësta scuadra ova mo n merdi ai 3.1. na partida contra l Renon, ma davia che la redazion à messù stlù ju n di dant, repurterons chëst’ena che vën de chësta partida.

I mutons dla Under 16 à jugà ai 23 de dezëmber te Sëlva contra la scuadra plu dëibla dl campiunat, l Pontebba. Perchël cialova duc ca, canche la stajova 2:2 do l prim tëmp. L Gherdëina se à stentà dassënn tl prim y permò tl terzo tëmp se à giaurì l buton, coche n dij, y l ie tumà n grumon de goi. Ala fin ai venciù per 20:3 cun i tëmps jic ora 2:2, 3:1, 15:0. La proscima partida arà la scuadra dla U16 n sada ai 7 de jené dala 16.30 tl stadio Pranives de Sëlva contra l Sterzing.

La Under 18 ie furneda ai 22 de dezëmber a Sterzing per jughé na partida segur de no saurida. I mutons à pona nce jugà mpue melsegures y nervëusc, savan che l averser ie una dla miëura scuadres dl campiunat. Purtruep ài perdù la partida per 1:6. La U18 à pona venciù l’ultima partida dl’ ”andata” (11 vëntes, 1 valiveda ora y 4 perdudes) contra l Varese per 4:0 (2:0, 1:0, 1:0). I mutons ne n’à, povester nce pervia dla festes, nia jugà tan cunzentrei y se à fat ert tl prim a fé ite i goi, ma ngali iela jita miec y l resultat ie tumà ora mpo bëndebò tler. N lunesc ai 2 de jené ài jugà a Latsch contra la scuadra dla Venuesta. Chësta partida se ài fat saurì a vëncer batan i patrons de cësa per 8:2 cun i tëmps jic ora 5:0, 1:2 y 2:0.

Per la Under 20 dl Sterzing/Gherdëina ie l campiunat talian inò jit inant n mierculdi ai 21 de dezëmber cun na partida a Bulsan tla Sill contra l EV Bulsan. I jëuni dl Sterzing/Gherdëina ova bën l juech tla man, purempò ne fova i patrons de cësa nia da sotvaluté y njeniei uni tant cun azions drët periculëuses. Ala fin dl prim tëmp stajòvela 2:0 per l Sterzing/Gherdëina y bel riesc tl segondo tëmp, cun n jugadëur mplu sun dlacia ie i patrons de cësa stac boni de ruvé plu daujin. Nce tl terzo tëmp fova l resultat mo daviert y permò sun la metà dl’ultima frazion de juech ie l Sterzing/Gherdëina stat bon de mëter al segur l resultat vencian per 5:2 cun i tëmps jic ora 2:0, 0:1, 3:1. Scialdi na bela partida, nteressanta y asvelta cun tramedoi scuadres al medemo livel, iel stat da udëi n juebia ai 29 de dezëmber a Burnech. L fova coche dit na partida scialdi valiva. L ie tumà puec goi y for jiva una na scuadra danora y l’autra fova pona bona de valivé ora nchin che, cun n gol puech dan la fin dla partida semiòvela fata per l Sterzing/Gherdëina. Ma pona à n jugadëur di nosc giapà doi menuc y i averseres à mo tëut ora l verdiaporta nsci che i fova de sies contra cater. Bel mpont ti iela jita fata de fé l gol y valivé ora mo per 3:3 ie dessegur n resultat giust per chësta partida. I tëmps ie jic ora 1:1, 0:0 y 2:2.

Turnoi da Nadel U15 dai 27 ai 29.12. a Romanshorn tla Svizra:
Tlo ova la scuadra de Südtirol da se museré contra plu scuadres dla Svizra, dl Bayern y dl’Olanda. L univa jugà partides da doi iedesc vint menuc y pona mo trat ai penalties y nce tlo pudòven se davanië n pont. Pra la scuadra dl Südtirol sot ai trainadëures Egon Schenk y Elmar Parth fòvel nce leprò i jugadëures de Gherdëina Lukas Stuffer, Simon Piccolruaz, Samuel Moroder, Patrick Nocker y Alex Lambacher che juega a Mannheim. Nce sce la scuadra de Südtirol ie ruveda ultima ala fin, pòssela mpo mustré su de biei resultac tla partides singules, mé n cont di penalties ne ti àla nia drë butà, perdan nsci ponc mpurtanc per la tlassifica. Venciù à la ”Suisse Romande” contra chëi che l Südtirol à perdù n iede 1:0 y pona 3:1. Segonda la Svizra dl Ost che à n iede valivà ora 1:1 y pona batù l Südtirol per 3:0. Terzo l Bayern, che l Südtirol à batù per 2:3 ma perdan dopro per 2:1. Cuarta ie la Svizra zentrela, nce tlo à l Südtirol n iede venciù y pona perdù per 1:0. L’Olanda ruveda cuinta mé per un n pont deplù, à l Südtirol n iede batù per 5:2 y dopro valivà ora per 1:1.

Turnoi Arge Alp U14 (foto), dai 26 ai 29.12. a Neumarkt y Kaltern:
Chëst ann àl pudù fé pea doi scuadres de Südtirol ajache chëla dl Vorarlberg ova desdit. La doi scuadres da tlo ova da se museré contra l Bayern, Baden Württemberg, i Grijons, St. Gallen, Tessin, Tirol y la scuadres talianes dl Venet y dl Trentino. Südtirol 1 ie tumà ora te semifinela contra l Baden Württemberg perdan per 3:4, ma se seguran pona l terzo post contra la scuadra di Grijons che i à batù per 4:3. Nce te chësc turnoi fova i resultac drët valives y la univa suvënz mé a dì de puech per ruvé inant. Venciù à l Bayern, 2. Baden Württemberg, 3. Südtirol I, 4. Grijons, 5. St. Gallen, 6. Venet, 7. Tessin, 8. Trentino, 9. Tirol y 10. Südtirol II.
Pra l Südtirol I cun l trainadëur Gottfried Kasslatter fòvel leprò i jugadëures dl HC Gherdëina Jan Demetz, Alexander Scherlin, Juri Runggaldier, Damian Bergmeister y Andreas Vinatzer. Pra l Südtirol II iel unì cherdà ite Lukas Piazza, Florian Moroder, Hannes Kasslatter y Diego Glück.