01.02.2012

Notizies di Jëuni

La Under 13 ruva segonda pra l turnoi di raions de Südtirol

Pra l turnoi Under 13 di raions de Südtirol à l raion nr. 4 (Sterzing, Puster, Gherdëina, Toblach), ulache l fova leprò 10 mutons dl Gherdëina, arjont l segondo post. Do la bona prima partida venciuda saurì contra l raion nr. 1 (Prad, Maran, Lana, Vinschgau, Siebeneich, EV Bozen) per 6:1 cun cin’ goi fac da jugadëures dl Gherdëina, se aspitòven che i vencëssa nce la finela contra l raion nr. 3 (Bulsan, Renon, Persenon, Leifers), ma purtruep iela jita autramënter, i mutons ne à nia fat na bona partida y do che la stajova giut alalongia 1:1 se ài 24 secunc dan la fin giapà l 2:1. Sun na tela ài riesc tëut ora l verdiaporta per mëter n jugadëur deplù sun dlacia, ma l ne n’à juà a nia y i se à mo giapà l gol dl 3:1 a cassa ueta. L raion 3 ie nsci ruvà prim, segondi ie chëi dl raion 4, terzi chëi dl raion 2 (Eppan, Kaltern, Neumarkt, Auer) y cuarti chëi dl raion 1.

La Under 14 dl Gherdëina àra si proscima partida de campiunat n dumënia ai 5 de fauré te Sëlva, dala 17.30, contra la scuadra dl Sterzing.

La Under 16 ie furneda n sada a Burnech per fé si partida de campiunat contra la scuadra dl Puster rateda, deberieda cun l Sterzing, una dla miëures dla Talia. I mutons dl Gherdëina à jugà na boniscima partida, povester una dla miëures de chësc campiunat. Doi tëmps ai tenì pea drët bën y permò tl terzo tëmp fovi stanc y à zedù, nce ajache i averseres fova majeri de età y sambën perchël nce fisicamënter plu stersc. L Gherdëina à perdù per 2:6 cun i tëmps jic ora 0:1, 1:2, 1:3.

La Under 18 ova n mierculdi ai 25 de jené na partida n cësa contra l Valpellice. Nce sce i mutons dl Gherdëina à duminà ntan dut l juech se ài stentà dassënn a fé l prim gol che ie pona permò tumà a mez al segondo tëmp. La partida ie fineda via cun la vënta dl Gherdëina per 3:0 cun i tëmps jic ora 0:0, 2:0, 1:0. N dumënia ai 29 de jené ie chësta scuadra furneda a Asiago per fé na partida contra la scuadra da iló. Contra la bona scuadra cumpata dl Asiago à l Gherdëina jugà drët bën, dantaldut tl terzo tëmp à i mutons dl Gherdëina drucà deplù, ma davia che l vën mo fat massa truep fai ndividuei ne ie i mutons nia stai boni de la tré decà y à perdù per 3:6 cun i tëmps jic ora 1:1, 2:3, 0:2.

La Under 20 dl Sterzing/Gherdëina (te la fotografia) à jugà n sada te Sëlva contra l Pontebba. Coche n se l aspitova ne n’iel nia stat rie bater i averseres te na partida ulache l univa scialdi mé jugà da una na pert dla plaza dala dlacia. I à venciù per 15:1 cun i tëmps jic ora 6:0, 4:0 y 5:1.