08.02.2012

Na ena cun auc y basc

La scuadra Under 12 ova doi juesc chëst’ena passeda y avisa n mierculdi te Sëlva contra l Puster, ulache i mutons à fat na boniscima partida y se ëssa merità de vëncer, ma i à massa falà la cassa. La partida ie fineda via a pèr cun l resultat de 2:2 y i tëmps jic ora 1:1, 1:1, 0:0). L’autra partida à chisc mutons abù n sada a Lana. La scuadra dl Gherdëina ne n’à nia fat massa na bona partida. Do l prim tëmp stajòvela 2:2, tl segondo tëmp ie i mutons stai boni de jì danora per 4:2, ma tl terzo tëmp ài pona purtruep lascià do y à scincà via la partida perdan per 4:5.

La Under 14 ova n dumënia ai 5 de fauré na partida contra l Sterzing. N savova che l Sterzing ie na scuadra plutosc dëibla y nsci iela nce stata. Do l segondo tëmp stajòvela bele 11:0 per l Gherdëina. Tl terzo tëmp ne n’iel plu tumà degun goi, che la verdiaporta dl Sterzing (na muta) à tenì drët bën y nsci ie l resultat resta medemo, 11:0 per l Gherdëina cun i tëmps jic ora 4:0, 7:0, 0:0.

La scuadra Under 16 ie furneda n mierculdi ai 1. de fauré a Pieve di Cadore a fé si partida contra l Pieve/Cortina. Ti prim doi tëmps à i mutons jugà plutosc melamënter, permò tl terzo tëmp ài jugà propi bën ti ruvan permez ai averseres nchin a valivé ora, ma sun l 6:6 à l Cortina puech dan la fin mo fat ite l 7:6, canche l Gherdëina ova n jugadëur sun banch di straufei. I tëmps ie jic ora 0:1, 5:1, 2:4. N sada ëssa pona chësta scuadra dassù furné a Varese, ma canche i mutons fova bele tl lëur de muever à l Varese desdit la partida pervia che l fova massa nëif sun l tët dl stadio. L sarà da udëi sce l Gherdëina messerà plu inant furné a Varese a fé do chësta partida o sce l Varese muessa ti la dé vënta, davia che l ie unì fat a l savëi massa tert.

La Under 18 à do n bon scumenciamënt tëut mpue massa ala lesiera la partida contra l Maran y do l segondo tëmp stajòvela mé 5:4 per l Gherdëina. Tl terzo tëmp ài pona mpo jugà plu cunzentrei y à mo fat set goi. La Under 18 à venciù la partida per 12:4 cun i tëmps jic ora 2:1, 3:3 y 7:0.

La Under 20 dl Sterzing/Gherdëina à jugà n sada contra l Neumarkt, scuadra che ova da mustré su chëst iede doi jugadëures che à jugà chëst ann regularmënter tla serie A2 cun l Kaltern y plu avisa se tràtel de Raphael Andergassen y Alex Frei – chësc ultim ova nce jugà l ann passà tla serie A1 cun l Puster. L Sterzing/Gherdëina ntant sce à messù ciafië zënza i jugadëures de majera esperienza. Sce n ti cëla a chiche à fat i goi, sàutel tler tl uedl che chësc duo à dessegur fat la defrënza y povester iela nce mpue stata nsci che, udan chisc jugadëures se sentivi bele dantaprima mpue perdui ne jugan nia cun la cunvinzion de pudëi da fé ca. L Sterzing/Gherdëina à perdù per 4:8 cun i tëmps jic ora 2:4, 1:0, 1:4.

FOTO: Mumënt ora de na partida di jëuni dl HC Gherdëina. (Fotografia de Andreas Senoner)