26.01.2012

La Under 14 à venciù duta la set partides

La scuadra Under 12 (te la foto) à fat na bela partida n sada ai 21 de jené a Bulsan tl Palaonda. I à jugà cunzentrei, i verdiaporta fova boniscimi y l arbitradëur à nce lascià jughé mpue dur y ne à nia sciblà uni cuntrast cun n penalty coche l ie scenó suvënz l cajo pra la U12. Mé doi goi ie tumei sun penalties. L Gherdëina à venciù cun merit per 6:4 cun i tëmps jic ora 1:0, 2:2, 3:2.

Under 14: nce sce la scuadra dl Gherdëina fova n dumënia ai 22 de jené do l prim tëmp 1:2 dovia contra la scuadra dl Eppan, ài tl segondo y terzo tëmp mustrà ai averseres che i ne la dà nia su tan aslune. I à jugà cun la cunvinzion de ulëi jì a se tò chisc doi ponc, vencian ala fin per 6:2 cun i tëmps jic ora 1:2, 3:0, 2:0. Nsci ài finà via chësta prima pert dla cualificazion per i campiunac taliani cun set vëntes sun set partides.
N dumënia ne arà chësta scuadra deguna partida davia che l vën metù a jì te Sëlva n turnoi di raions de Südtirol per i nasciui tl ann 1999. Scumencià vëniel dala 9.30 cun l raion nr. 4 (ulache l ie leprò bën 10 mutons de Gherdëina) contra l raion nr.1. Tlo dessot duta la scuadres che fej pea:
Raion nr. 1 = Prad, Maran, Lana, Vinschgau, Siebeneich, EV Bozen. Raion nr. 2 = Eppan, Kaltern, Neumarkt, Auer. Raion nr. 3 = Bulsan, Renon, Persenon, Leifers. Raion nr. 4: Sterzing, Puster, Gherdëina, Toblach.

Per la Under 18 ne n’iel stat nia da n fé contra i prims te tlassifica dl Puster. Tl prim tëmp ie i mutons mo stai boni de ti tenì permez, ma pona à i pustri cun si majera esperienza fat la defrënza. L Gherdëina à perdù la partida per 2:6 cun i tëmps jic ora 1:2, 1:3, 0:1. La U18 arà n mierculdi ai 25 de jené dala 15.30 na partida n cësa contra la scuadra dl Valpellice.

La Under 20 dl Sterzing/Gherdëina ova n sada dl’ena passeda na partida mpurtanta contra l Asiago, ma l ne n’ie stat nia da n fé. I jëuni dl Sterzing/Gherdëina ne n’à nia jugà bën assé per ti vester a chësta scuadra drët sterscia che se segurea śën la segonda pusizion te tlassifica dan a d’ëi. Tl prim tëmp fòvela mo plutosc valiva, ma cun l Asiago che ie for bon de jì danora. Tl segondo tëmp la desfata dl Sterzing/Gherdëina che se giapa trëi goi plutosc ndolauter y ne n’ie nia bon de abiné l drë juech per na reazion. Tl terzo tëmp pudova i averseres jughé zënza prescion avan n bel plumac de goi y i nosc ie mo stac boni de smendré n śich la defrënza, ma nia scialdi deplù.  L Sterzing/Gherdëina à perdù per 2:5 cun i tëmps jic ora 1:2, 0:3, 1:0. Duman sada jugherài a Sterzing contra l Pontebba.