12.01.2012

La U14 va a var plën

L Gherdëina à perdù la partida per 1:4 cun i tëmps jic ora 0:1, 1:2, 0:1.N dumënia ai 7 de jené à i mutons dla U10 pona messù furné a Toblach per fé si proscima partida de campiunat. La scuadra dl Gherdëina à venciù saurì per 4:0. Doduman dumënia ai 15 de jené à la U10 na partida n cësa dala 10.00 danmesdì contra l Neumarkt.

La Under 14 à ai 3 de jené jugà sun l Renon contra la scuadra da iló. I mutons ulova vëncer a duc i cosć chësta partida drët sentida y bele dal scumenciamënt inant ài jugà cun cunvinzion y drët cunzentrei. Do l prim tëmp stajòvela mé 1:0 per i averseres y l Gherdëina à pona drucà mo deplù. Tenian ju i doi miëur jugadëures dl Renon iesi stai boni de jì danora do l segondo tëmp per 4:2. La scuadra dl Gherdëina se à nce tl’ultima frazion desmustrà plu sterscia y nce l verdiaporta a tenì dut chël che fova da tenì. I mutons dla U14 à venciù chësta partida per 7:3 cun i tëmps jic ora 0:1, 4:1, 3:1. La legrëza fova granda, nce ajache l ie bele truep ani ca che n à venciù sun Renon contra chësta scuadra. N muessa propi ti fé na gran lauda ai mutons y sambën nce al trainadëur Vito Delucca, che à sapù da ti dé la drëta tatica y mutivazion ai mutons. N l di de Santa Guania à pona chësta scuadra jugà n cësa contra l Auer. Nia scialdi da dì ne n’iel de chësta partida venciuda drët saurì dala scuadra dl Gherdëina per 8:0 cun i tëmps jic ora 1:0, 3:0, 4:0. Bele doi dis do à pona la U14 jugà contra la scuadra de Puster te Sëlva. Do avëi duminà ti prim doi tëmps ie l Gherdëina do l prim gol di pustri unit mpue nervëus y la ie pona mo unida bëndebò ciauda. L Puster ie ruvà daujin nchin al 3:2, ma mez menut dan la fin ti àla per fertuna butà mo n iede al Gherdëina vencian nsci la partida per 4:2 cun i tëmps jic ora 1:0, 2:0, 1:2. Do chësta bela vënta y do cin’ partides dla raida de cualificazion per l campiunat talian, dutes cin’ venciudes, ie la Under 14 dl Gherdëina śën al prim post te tlassifica cun 10 ponc. Speron che la ti bute inant nscila.

Sun la Under 16 aspitòvel na partida bëndebò ria ai 5 de jené tl stadio Pranives de Sëlva contra la miëura scuadra dl campiunat, l Sterzing. Da una na pert fòvel l Sterzing che à mutons nasciui tl 1996/97 mé da crì ora y dal’autra pert l Gherdëina che n à purtruep puec de granc y che muessa jughé cun ades diesc mutons dla U14. Nsci ne n’iel sambën nia saurì fé, ma ntant mpera chisc mutons for leprò nce sce i pierd sëch. L Gherdëina à perdù chësta partida per 1:10 cun i tëmps jic ora 0:5, 0:3, 1:2.

Per la Under 18 à l ann scumencià bën plu per l resultat che per la cualità dl juech. Venciù à i mutons dl Gherdëina, ajache i ie stai boni de cumbater nchin ala fin te na partida ulache l ne garatova nia scialdi. La U18 à venciù te Sëlva contra l Neumarkt per 3:1 cun i tëmps jic ora 1:0, 0:1, 2:0.
N dumënia ai 8 de jené ie chësta scuadra furneda a Eppan a fé si partida de campiunat contra la scuadra da iló. I mutons ova na gran ulentà de vëncer y à cumbatù dassënn, ma pervia de massa menuc de straufonga y falan truepa ucajions da gol iela jita ora a pèr per 3:3 cun i tëmps jic ora 0:2, 2:1, 1:0. La scuadra dla U18 fej si proscima partida de campiunat n dumënia ai 15 de jené dala 18.30 te Sëlva contra la scuadra dl Renon.

La Under 20 dl Sterzing/Gherdëina à jugà n cësa a Sterzing ai 3 de jené contra l Cortina, scuadra che ti dà daniëura da cë ai nosc. Bele lavia a Cortina tl scumenciamënt dl campiunat ne se àn nia fat saurì, iló ài valivà ora mé per 1:1. Chëst iede n cësa a Sterzing ne n’àla ënghe no ulù vester. Tl prim tëmp ie l Sterzing/Gherdëina stat bon de jì danora, ma riesc lessù à i averseres valivà ora y bel riesc tl scumenciamënt dl segondo tëmp iesi pona jic danora. Nce sce n à mo abù belau doi tëmps ntieres da purvé a tré decà la partida, ne n’iela nia jita y l Sterzing/Gherdëina à nsci messù ti la zeder al Cortina per 1:2 cun i tëmps jic ora 1:1, 0:1, 0:0. N sada ovi da se museré cun l Eppan, che n cunscidrova n averser nia tan rie da bater. Che n ne dëssa mei s’la tò massa ala lesiera àn inò n iede udù te chësta partida. Permò tl terzo tëmp ie i jëuni dl Sterzing/Gherdëina stac boni de fé la defrënza vencian ala fin per 5:0 cun i tëmps jic ora 0:0, 1:0 y 4:0.